CCM YAPIGA MARUFUKU MAKUNDI NDANI YA CHAMA HICHO

Na Mahmoud Ahmad Arusha

CHAMA cha Mapinduzi ,CCM, mkoa wa Arusha, kimepiga marufuku makundi yote  ndani ya chama ambayo yalikuwa kwa ajili ya uchaguzi mkuu kwa ajili ya kukipatia ushindi chama cha mapinduzi kwenye uchaguzi mkuu Oktoba 2015.

Katibu wa Itikadi na Uenezi, wa ccm, mkoa wa Arusha, Shaban Mdoe, amesema chama cha mapinduzi kwenye kikao chake cha kamati ya Siasa ya halmashauri kuu ya mkoa, imepiga marufuku makundi hayo kuanzia Augosti 22 mwaka huu .

Amesema  baada ya kamati ya siasa kuridhika kuwa kwa sasa makundi hayo hayana tija na kuendelea kuwepo yataleta mgawanyiko ndani ya chama hivyo kimeazimia  makundi yote yavunjike na kubakia kundi moja tu la chama cha mapinduzi..

Amesema miongoni mwa makundi hayo ni lile linalojiita Team Magufuli, na Club Magufuli, Chama cha mapinduzi kilitumia mbinu mbalimbali za kuwafikia wapiga kura ikiwemo kwenye mikutano  ya kampeni  kupitia Chama na jumuia zake  pam,oja na mitandao ya kijamii .

Amesema kwa siku za hivi karibuni kumeibuka  tena kwa kundi linalojiita Team Magufuli  na kufanya shughuli mbalimbali  bila kukihusisha Chama  wala jumuia zake ambapo ni kinyume  na taratibu na kundi hilo halitambuliki tena na chama kwa kuwa lililokuwepo lilishafutika baada ya uchaguzi kumalizika.

Mdoe, amesema kutokana na hali hiyo Chama cha Mapinduzi, kinatoa onyo  kwa watu wanaoanzisha makundi  ya namna hiyo kwa jina la Chama pasipo idhini  na kufanya mambo nje ya  utaratibu  kuacha mara moja.

Amesema Chama cha mapinduzi hakitasita kuwachukulia hatua za kisheria wale wote watakaoanzisha makundi mengine .

.Mdoe, amesema mara baada ya uchaguzi mkuu kumalizika ccm mkoa wa Arusha haina makundi ya wanachama bali ina kundi moja tu la CCM.