WADAU WATAKIWA KUSHIRIKIANA KUTOA HAKI KWA WAKATI

Mcheza sarakasi kutoka Arusha Arts Group akipokea michango ya hiari kutoka kwa viongozi wa meza kuu wakati wa maadhimisho ya siku ya sheria yaliyofanyika kwenye viwanja vya Mahakama Kuu mkoa wa Arusha,kutoka kushoto ni Jaji wa Mahakama Kuu kanda ya Arusha,Salma Maghimbi,Kaimu Jaji Mfawidhi wa Mahakama Kuu Kanda ya Arusha,Sekela Moshi,Mkuu wa mkoa wa Arusha,Mrisho Gambo na Jaji Dk Modesta Opiyo.Picha na Filbert Rweyemamu

Jaji wa Mahakama Kuu Kanda ya Arusha,Dk Modesta Opiyo akizungumza katika maadhimisho ya siku ya sheria yaliyofanyika katika viwanja vya Mahakama Kuu mkoa wa Arusha,kushoto ni Kaimu Jaji Mfawidhi wa Mahakama Kuu Kanda ya Arusha,Sekela Moshi na Mkuu wa mkoa wa Arusha,Mrisho Gambo.

Kaimu Jaji Mfawidhi wa Mahakama Kuu Kanda ya Arusha,Sekela Moshi(katikati)akizungumza na majaji wenzake wa mahakama hiyo kushoto ni Jaji Salma Maghimbi na Jaji Dk Modesta Opiyo baada ya maadhimisho ya siku ya sheria yaliyofanyika katika viwanja wa mahakama kuu Kanda ya Arusha.

 

 

                                                                      Mahmoud Ahmad

Kaimu Jaji Mfawidhi wa Mahakama Kuu Kanda ya Arusha,Jaji Sekela Moshi amesema utoaji haki katika mifumo ya mahakama una nafasi kubwa katika maendeleo ya nchi iwapo kila mhusika atatimiza wajibu wake kwa wakati.

Akizungumza  katika  maadhimisho ya siku ya sheria mkoa wa Arusha yaliyofanyika katika viwanja vya Mahakama Kuu Kanda ya Arusha alisema Katiba ya Jumhuri ya muungano inaweka misingi ya utoaji haki ambayo Mahakama inapaswa kuizingatia katika kutekeleza majukumu yake ya kikatiba.

Alitaja misingi hiyo kuwa ni kutenda haki kwa wote bila kujali hali ya mtu kijamii au kiutamaduni,kutokuchelewesha haki bila sababu ya msingi na kutenda haki pasipo kufungwa kupita kiasi na masharti ya kiufundi yanayoweza kukwamisha haki kutendeka.

Jaji Sekela alisema serikali ya awamu ya tano imejikita kwenye sera ya kukuza uchumi wa viwanda na mahakama kama chombo pekee cha utoaji haki hakiwezi kujitenga  kwa vyovyote na sera hiyo ambayo  katika hali ya kawaida ni vigumu sana kuona moja kwa moja jinsi mahakama inavyochangia ukuaji wa uchumi.

“Kwahiyo ni wazi kwamba utoaji haki kwa wakati unaenda sambamba na ukuaji wa uchumi hivyo Mahakama ni mdau muhimu katika ukuaji wa uchumi wa nchi yetu hii itafanyika iwapo Mahakama itashughulikia migogoro mapema ambayo itavutia wawekezaji wengi  kuja nchi wakiamini kwamba endapo kutatokea mgogoro utatatuliwa mapema,”alisema Jaji Moshi

Kwa upande wake Mwenyekiti wa Chama cha Mawakili Tanganyika mkoa wa Arusha,Modesta Akida alisema kumekua na changamoto ya ucheleweshwaji wa kesi kunakosababishwa na upungufu wa idadi ya watendaji katika mahakama na Baraza la Ardhi na Nyumba la wilaya.

“Hali ya utoaji haki kwa wakati katika mashauri ya madai bado inahitaji msukumo kwani bado yapo mashauri yenye umri wa miaka zaidi ya mitano ambayo hayajatolewa maamuzi hadi sasa huku kumbukumbu ya masjala ya Mahakama Kuu Arusha inaonyesha kuwa shauri la madai lililokaa kwa muda mrefu ni la mwaka 2008,”alisema Akida

Alisema lengo la kuharakisha kuyatolea mashauri mahakamani kwa wakati ni kusaidia ukuaji wa uchumi kunakochangiwa na mazingira mazuri ya kibiashara na uwekezaji.

Naye Wakili Mwandamizi wa serikali,Dionis Makule aliwataka wadau wote kushirikiana ili kuwezesha kupatikana kwa haki kwa wakati ili kudumisha amani na utulivu.